CEBU, Philippines - Usa ka panadero maoy nahimong labing unang nakombikto sa korte tungod sa kasong kalapasan sa Comelec Gun Ban.
Si RTC-7 Branch 17 Judge Silvestre Maamo Jr. mikombikto kang Argie Alceda, lumad nga taga siyudad sa Sugbu.
Kini human mi “plead guilty” si Arceda ug miangkon sa iyang kasaypanan atol sa gipahigayong arraignment sa kaso niini kagahapong adlawa.
Human sa pag-angkon sa maong salaod, si Judge Maamo mipahamtang dayon og silot ngadto kang Alceda sa pagkabilanggo gikan sa usa ka tuig hangtud sa duha ka tuig.
Mimando usab si Judge Maamo nga hukasan ang kombiktado sa iyang katungod sa pagbotar karong umaabot nga presidential election sa bulan sa Mayo ning tuiga.
Nasayran nga si Alceda gidakop sa kapolisan niadtong Pebrero 9 ning tuiga human makuhai og .38 kalibreng armas nga may upat ka mga buhing bala atol sa gipahigayong checkpoint sa kapolisan samtang kini padulong molarga sa Iligan City.
Ang prosekusyon aduna pay walo ka mga kasong susama niini nga gikatakdang isang-at pa ngadto sa korte. - Chester Abadilla (BANAT NEWS)