CEBU, Philippines - Usa ka importer og trucker ang misang-at og reklamo ngadto sa Visayas Ombudsman batok sa hepe sa Customs Intelligence and Investigation Service sa Port of Cebu aron kini imbestigahon.
Ang reklamanteng si Hans Ernest Tan Aparice III, nga may negosyo sa barangay Subangdaku sa dakbayan sa Mandaue miawhag sa ombudsman nga paimbestigahan si Atty. Rico Rey Francis Holganza tungod sa pagka-overstaying niini ug pagsusi sa lifestyle niini.
Si Holganza matud pang Aparice nasulod sa maong buhatan sukad pa niadtong 2003 nga gihulagway sa reklamante nga gawas pa nga ‘non-organic,’ overstaying na usab kini maong dunay mga kawani sa CIIS na ang nagpangutana kabahin niini.
Ang reklamante miawhag usab sa anti-graft court nga susihon ang lifestyle ni Holganza tungod sa giingong mansyon niini sa Sparrow St. Santo Niño Village sa barangay Banilad; 3-storey building sa Macopa St. sa barangay Mambaling; ang air-conditioned nga buwangan sa Bantayan Island ug umahan niini sa maong isla ingon man mga sakyanan.
Kini bisan paman ang sweldo niini P14,000 lamang matag buwan kun P168,000 matag tuig isip legal officer II nga may Salary Grade 17.
Ang reklamante mipasukip diha sa iyang reklamo sa hulagway sa giingong mansyon ug building nga gipanag-iya ni Holganza. Dugang awhag ni Aparice sa ombudsman ang pagpahigayon og fact-finding inquiry kabahin sa smuggling sa pseudo ephedrine dinhi sa Sugbu niadtong Marso 5, 2004.
Mialegar ang reklamante nga bisan ang media ‘nabayran’ aron di mogawas ang pangalan sa maong hepe sa mga balita maong wala kini maapil sa imbestigasyon ug nakasuhan.
Gisuwayan sa Banat News pagtawag ang telepono ni Holganza apan walay motubag sa telepono niini. Apan sa pamahayag niini sa The Freeman nga igsuong pamantalaan sa Banat News miangkon kini kabahin sa giingong kayutaan nila sa Bantayan apan iya kini sa iyang inahan nga ilahang gi-develop ug wala niya itago.
Gihimakak hinuon niini ang kabahin sa giingong mansIyon sa Banilad ug wala gani siya makatultol niini, samtang ang 3-storey building sa Mambaling kaniadto pa nila ni nga propiyedad sa dihang wala pa siya sa CIIS.
Buot usab susihon ni Holganza kun tinuod ba kining reklamante ug ang motibo niini pagpasaka og reklamo kaniya. – BANAT NEWS