CEBU, Philippines - Sobra usa ka gatos ka mga pamilya ang nakabenipisyo sa hingpit nga pag-angkon nila sa luna nga ilang gipuy-an sulod sa dugay nang mga katuigan pinaagi sa pagdata-data nga walay downpayment diha sa sitio Sibuyas barangay Paknaan siyudad sa Mandaue.
Kini human pormal nga giapod ni Kongresista Nerissa Soon Ruiz ang certificates of occupancy permit ngadto sa dili mominos 34 ka mga pamilya sa maong lugar niadtong milabay’ng adlaw.
Gipasabot sa Presidente sa Consultative Assembly of Mandaue City’s Neighborhood Inc. kon CENAMO Inc. Danny Daniel nga mao pa kini labing unang batch sa mga sakop sa Star Apple Settlers Homeowners Ass. Inc. kon SASHOA tungod kay ang nahabiling mga pamilya wala pa makakompleto sa ilang mga dokumento.
Nagpasalamat si Daniel kang Ruiz kinsa maoy milihok sa maong transaksyon nga direktang pagpalit sa mga luna nga gipuy-an sa tag 500 pesos lang nga datahan matag bulan ug impason hangtud sa 25 ka tuig nga walay downpayment.
Gibana-banang moabot og 40 ngadto sa 50 metro kwadrado ang matag luna nga gi-award sa mga hingtungdang pamilya.
Ang presidente sa SASHOA, Rogelio Canama mihangop sa maong kalambuan tungod kay hinay-hinay nang natuman ang dugay na nilang gipangandoy nga maangkon sa hingpit ang luna nga ilang kasamtangang gipuy-an nga gipanag-iya sa magpapatigayong Matilde Ceniza. (Darrel Carumba) (BANATNEWS)