CEBU, Philippines - Napamatud-ang sad-an sa Visayas Ombudsman ang mayor sa lungsod sa Tudela sa isla sa Camotes sa kasong gipasaka sa iyang mga kontra sa politika.
Ang Ombudsman nakakita og kasaypanan nga nabuhat ni Tudela Mayor Rogelio Baquerfo sa kasong discourtesy of public official nga giaprubahan gyud mismo ni Ombudsman Merceditas Guttierez.
Apan ang silot nga gipahamtang ngadto kang Baquerfo mao lamang ang reprimand kon pagpangasaba uban sa hugot nga bahad nga sa higayon nga mohimo kini sa pag-abuso sa iyang katungdanan mapahamtangan na kini og mas bug-at nga silot.
Nasayran nga ang bise mayor ni Baquerfo nga si vice mayor Clint Maratas maoy mipasaka og kaso batok niini niadtong Marso tuig 2009 tungod sa pagpalayas niini kang Maratas sa kaugalingong buhatan niini ug sa konseho sa lungsod ug gibalhin sa opisina sa municipal Comelec office.
Kini tungod kay si Baquerfo nagtinguha nga himuong visitor's room ang buhatan sa bise mayor ug ang buhatan sa konseho sa lungsod.
Si Mayor Baquerfo gipahimangnuan nga dili na usbon ang susamang pag-abuso sa katungdanan kay mahimong mapahamtangan kini og silot.
Ang buhatan sa DILG-7 gihatagan usab sa kopya sa desisyon sa Ombudsman aron makakuha kini og basehanan sa pagpahamtang og mas bug-at nga silot sa higayon nga makasuhan usab kini diha sa DILG. (BANATNEWS)