CEBU, Philippines - Gisusi karon sa mga opisyal sa Provincial Investigation and Management Bureau (PIMB) sa gibuhat ni PO2 Vilma Degamo sa pag-interbener niini sa gibuhat sa kapolisan sa dakbayan sa Carcar kinsa misikop sa duha ka Pakistani nga milugos og 15-anyos nga katabang.
Si Sr. Insp. Ruben Cuizon, hepe sa PIMB nagkanayon nga ang maong lakang ilang himoon human nila madawat ang reklamo sa mga kapolisan sa Carcar kalabot sa gibuhat ni Degamo.
Kini sa dihang matud pa miinsister si Degamo nga dili una ipasikop ang duha ka suspetsadong langyaw nga manlulugos kay nagpaabot pa sa ilang abogado.
Hinuon si Degamo nakapasabot na sa iyang bahin , apan matud pa ni Cuizon nga ila gyud ning imbistigahon aron pagsuta kun may nalapas ba siya o wala.
Sayo niini mireklamo ang kapolisan sa Carcar kay si Degamo maoy giingong miinsister nga ang mga suspetsadong sila si Ahmmel Ullah, 19 ug Muhammad Gulnabe , 31, kinsa giingong milugos sa 15 anyos nga katabang sa panimalay, dili ipadala ngadto sa prisohan.
Matud pa ni Cuizon nga kun mamatud-ang sad-an si Degamo mahimong suspensuhon kini o kaha tangtangon gikan sa serbisyo. - Lesley Caminade (BANAT NEWS)