CEBU, Philippines - Angay palapdan ang programa sa eco-tourism sa usa ka lokal nga kagamhanan sama sa siyudad sa Sugbo aron makahatag kini og daghang trabaho sa mga lumolupyo, sumala pa sa usa ka kandidato pagka-bise mayor sa dakbayan.
Si kanhi Col. Rico Palcuto nagkanayon nga kun tinguhaon sa siyudad ang pagpalapad sa turismo, ang mga residente mahatagan og trabaho nga tarong.
Sumala pa ni Palcuto nga kun adunay daghang trabaho sa siyudad, makatabang kini pagpakunhod sa kalisud nga maoy sagad sinugdanan sa krimen.
“If we don’t have such program that will uplift the lives of our constituents, the threat to security and peace in the locality will continue to hamper our development,” si Palcuto miingon.
Gitataw niya nga dako og matabang ang mga local job’s fair aron makakunhod sa unemployment rate sa siyudad.
Gidugang niya nga dili hinuon paigo ang pagbukas og programa nga makahatag og trabaho sa mga lumolupyo, tungod kay matud niya nga kinahanglan usab ma-monitor ang kahimtang sa mga trabahante ug management sa ingon malikayan ang mga labor disputes nga sagad makaguba sa ekonomiya. - John Rey Saavedra (BANAT NEWS)