CEBU, Philippines - Mas gihatagan og gibug-aton ni Police Regional Office-7 director Lani-O Nerez ang sumbong sa guwardiya sa usa ka condominium sa eskina Ranudo ug D. Jakosalem ug sakop sa Special Weapons and Tactics sa Cebu City Police Office kay sa reklamo sa sinagop ni Mayor Socrates Fernandez nga si Joavan.
Si Joavan misumbong sa Fuente Police Station ug mialegar nga gi-harass sa guwardiya sa Indiana Condotel. Mireklamo usab siya nganong ang mga sakop sa SWAT ang mi-alarma.
Gipatin-aw ni Nerez nga walay nalapas nga balaod si Dennis Tuñacao sa iyang pagpahibalo sa kapolisan nga adunay armadong tawo nga nakasulod sa usa ka unit sa condotel nga iyang gibantayan.
Mipasabot usab si Nerez nga sakto lang nga ang SWAT maoy motubag sa alarma tungod kay kun armado man ug usa kini ka standard operation procedure nga SWAT ang ipadala.
Mipahimangno usab si Nerez ngadto kang Joavan nga pasugdon sa pagdisiplina sa iyang kaugalingon kini tungod kay kun magpadayon siya og pabuyag ngadto sa kapolisan ug sa katawhan dili usab ang kapolisan mohunong pagbadlong kaniya.
“He should respect the rights of the people. No one is above the law. Dili siya exempted sa balaod. He’s not somebody,” pasabot pa ni Nerez.
“Bago siya moreklamo iya usa nga huna-hunaon ang iyang gipangbuhat,” pasabot pa ni Nerez.
Si Nerez mikuwestiyon usab sa padayong paggamit ni Joavan og sakyanan nga nagtangag og red plate. Matud niya kun si kinsa nakadestino ang sakyanan sa gobyerno nga gigamitgamit ni Joavan, angay kini patubagon sa Ombudsman.
Kahinumduman, si Joavan gialarma sa mga sakop sa SWAT human mitawag sa Fuente Police Station ang guwardiya nga si Tuñacao tungod kay armado si Joavan. (BANATNEWS)