CEBU, Philippines - Nagpabiling wala pa hiilhi ang usa ka babaye nga gituohang adunay kakulian sa pangisip nga naligsan patay sa dalan United Nation Avenue sa barangay Umapad, dakbayan sa Mandaue niadtong miaging Domingo sa gabii.
Si SPO3 Eleazar Saromines, imbestigador sa traffic division sa Mandaue City Police Office (MCPO) nga nahinabi sa Banat News miingon nga ang patay’ng lawas sa maong biktima anaa kasamtangang gihaya karon sa usa ka punerarya sa dakbayan.
Dugang pa niya nga ilang gipaabot ang mga kabanay sa biktima nga nawad-an sa ilang sakop sa pagsusi sa ilang buhatan alang sa pag-ila sa maong biktima kansang lawas nahiagum sa grabeng kadaot nga maoy hinungdan sa iyang hinanaling kamatayon.
Si Saromines miingon nga si Marcelito Solano, 37, nga taga Cogon East Carmen, Cebu maoy nagmaneho sa yellow taxi gikan sa dakbayan sa Lapulapu. (Romeo T. Limpangog) (BANATNEWS)