CEBU, Philippines - Tulo ka tawo ang nasikop human giingong misuway paglikay sa checkpoint sa Theft and Robbery Section ug miangol sa usa ka traffic enforcer nga misuway og babag kanila niadtong miaging gabii sa barangay Quiot Pardo.
Ang nasikop mao sila si Cliford Lagasca, 21, Jay Zamora, 24, ug Richard Ramirez, 19, pulos molupyo sa Lupa Sapangdako barangay Guadalupe.
Samtang ang naangol nga enforcer mao si Rommel Yburan, nga nadestino sa Quiot Pardo.
Sa pakighinabi sa Banat News ni Insp. Michael Anthony Bastes, hepe sa TRS nagkanayon nga si Yburan nagsilbing bantay kun ugaling musuway paglihay ang mga motorista sa checkpoint.
Tuod man, dihang nakit-an sa tulo ang checkpoint dali kining misuway og likay apan gibabagan kini ni Yburan hinungdan nga gidasmagan kini sa tulo hinungdan sa iyang pagkaangol sa bukton.
Ang tulo nasikop ug nakuhaan og usa ka buhing bala sa kalibre .357 samtang napakyas ang tulo pagpresentar og rehistro sa motorsiklong ilang gisakyan ug nasutang gipanag-iya kini sa usa ka Kris Joy Taludra nga una nang midangop kanila niadtong milabay'ng semana. – BANAT NEWS