CEBU, Philippines - Nagkadako ang kahigayonan nga ipaubos sa Comelec control ang ika-upat nga distrito sa lalawigan sa Sugbo sa Mayo 10 nga piniliay alang sa pagpatigbabaw sa kahusay ug kalinaw.
Si Kongresista Benhur Salimbangon mipadayag sa mga tigbalita nga positibo ang tubag sa iyang giduso nga hangyo ngadto sa Comelec-Manila nga ipa-ubos sa pagkontrolar sa maong ahensiya ang iyang distrito.
Si Salimbangon miingon nga makaayo sa distrito ang pagpaubos sa Comelec control ug angay usab kining suportahan sa iyang mga kaatbang sa politika sa maong lugar.
Si Salimbangon magpasubli pagka-kongresista karong Mayo 2010 nga eleksiyon atbang kang kanhi Mayor Celestino “Tining” Martinez. Adunay desisyon ang Korte Suprema nga si Martinez ang mananaog, apan si House Speaker Prospero Nograles nagkanayon nga dili siya makalingkod isip kongresista sa ika-upat nga distrito.
Si Cebu City south district election supervisor Edwin Cadungog nga mitambong sa samang forum nga gihimo sa usa ka kapehan sa dalan Gorordo mipasabot nga ang usa sa mga basehanan pagpaubos sa Comelec control sa usa ka dapit mao ang bayolenteng panghitabo nga naglambigit sa politika.
Gitataw niya kun sa nangaging piniliay natala ang mga panghitabo nga bayolente nga ang hinungdan mao ang higpit nga panag-atbang sa politika dako ang kahigayonan pagpaubos sa pagkontrolar sa ahensiya ang maong lugar. – BANAT NEWS