CEBU, Philippines - Kabanay sa gipasanginlang notadong drug pusher sa barangay Labugon misuway og rescue niini, usa ka polis naangol tungod sa kalit nga pagkuninit kanila sa mga tawo atol sa operasyon diha sa sitio Chicos sa barangay Labogon sa dakbayan sa Mandaue sa milabay'ng hapon.
Ang nasikop mao si Vicente Flomentera, 47, residente sa maong dapit nga sumala pang Mandaue City Police Office director Sr. Supt. Noel Gillamac dugay na nga namaligya og shabu sa maong dapit gani nalakip kini sa watch list sa kapolisan.
Ang mga polis sa Station 3 nga sila si PO2 Fernando Fernan, PO1 Jerry Gascona ug PO1 Waldo Batad mipahigayon og buybust operation sa milabay'ng alas 3:20 sa hapon.
Si Flomentera gikatahong gipalitan og duha ka gagmay'ng pakete sa gituuhang shabu sa police decoy ginamit ang P300 nga marked money, human matunol ang ilegal nga drugas daling gisikop ang suspek.
Nakuha sa iyang posesyon ang P990 nga gituuhang halin sa ilegal nga drugas ingon man ang marked money, apan dihang dad-on na unta kini sa kapolisan kalit nga miabot ang igsuon niining si Ruben Flomentera ug anak niini dayong babag sa mga polis.
Tungod niini mitumaw ang komosyon sa dapit dihang gilayog nila ni Flomentera ang mga polis nga miresulta sa pagkasamad sa walang kamot ni PO2 Fernan.
Diha lang nangikyas ang grupo dihang nangabot ang mga kaubanan ni Fernan ug wala na maapsi pa, wala hinuon molampos ang grupo pag-rescue kang Flomentera.
Kasong kalapasan sa RA 9165 ubos sa Sec. 5 ug 11 ang ipasaka batok ni Flomentera ug kasong obstruction of justice ug direct assault usab ang ipasaka batok sa igsuon niini. (BANATNEWS)