CEBU, Philippines - Lima ka tawo ang gikatakdang ipaubos sa polygraph test may kalambigitan sa imbestigasyon sa kapolisan sa dakbayan sa Talisay kabahin sa pagpatay sa usa ka 80-anyos nga lalaki diha sa barangay San Isidro, dakbayan sa Talisay.
Si Hilario Apa, residente sa nahisgutang lugar ang napalgang patay na niadtong Huwebes sa buntag diha sa sala sa iyang balay nga ang baba gitabunan og unlan ug gitaptapan og packaging tape lakip na ang mga kamot.
Si Supt. Henry Biñas, hepe sa Talisay City Police Station sa pakighinabi niini sa Banat News nagkanayon nga duna siya’y katahap nga kaila ra sa biktima ang mga kriminal.
Base sa imbestigasyon walay nakitang gipugos sa mga mamumuno pagsulod ang panimalay sa biktima samtang wala usab timailhang gitulis o gikawatan si Apa tungod kay walay mga butang nga nawala bisan gani ang relo ni Apa nga mahalon diha pa man sa bukton niini. Matud sa hepe nga usa sa ilang gisusi karon mao ang kabahin sa personal nga bangi sa sulod sa pamilya ni Apa.
Ang lakip sa ipailawom sa polygraph test naglangkub sa katabang, pag-umangkon, anak ug asawa ni Apa nga diha himuon sa National Bureau of Investigation (NBI).
Si Apa nag-inusara lang diha sa ilang balay sa San Isidro tungod kay ang iyang asawa nag-atiman sa ilang negosyo sa dakbayan sa Lapu-Lapu ug matag semana lang moduaw kaniya. – BANAT NEWS