CEBU, Philippines - Nasikop sa akto ang lima ka mga tawong gipasanginlang nangawat og binaril nga gasolina sa abyon diha sa Mactan Cebu International Airport sa milabay'ng gabii sa mga sakop sa Police Center for Aviation Security-7.
Ang mga nasikop mao sila si Shajid Hafeel, usa ka refueler sa Safe Air Corporation; Dennis Quistoy nga usa ka gwardiya ug sakop sa Mustang Security Agency; Patrick Santillana driver sa truck; Louelle Guitguit ug Jumar Caray mga helper sa truck.
Matud pa ni PCAS-7 chief, Sr. Supt. Joselito Salido dugay na silang nagduda sa operasyon sa maong truck nga magdala-dala og mga binaril nga gasolina gikan sa MCIA cargo area ngadto sa gawas sa maong tugpahanan.
Gumikan niini ilang gihup-an mga alas 10:45 pasado sa milabay'ng gabii ang maong sakyanan aron kini sitahon, tuod man ilaha kining gidakop nga nagdala og pito ka drums nga Jet A1 fuel nga maoy gasolina sa mga abyon.
Sumala pa ni Salido nagduda silang kakunsabo sa grupo ang gwardiyang si Quistoy sa operasyon hinungdan nga ilaha kining giapil pagsikop.
Matud pa ni Salido ibaligya sa mga suspetsado sa kantidad nga P10 mil matag usa ka drum, presyo nga mas barato kun itandi sa bag-ong gasolinang mokabat ngadto sa dul-an P30 mil matag drum.
Ang maong gasolina gikatahong paliton sa mga yanong residente sa Sugbu nga mogamit og ‘petromax’ sama sa mga mananagat apan sa report sa TV Patrol Central Visayas si Salido mibutyag nga duna sila'y pagdudang ibaligya kini ngadto sa mga gagmay'ng operators og charter planes.
Ang PCAS-7 padayon pa sa imbestigasyon pagsuta kun asa kuhaa ug dad-a ang mga kinawat nga mga fuel sa maong grupo.
Ang lima ka suspetsado pasakaan og kasong kalapasan sa Anti Fencing Law ug Qualified Thief ngadto sa hukmanan. – BANAT NEWS