CEBU, Philippines - Usa ka call center agent ang naluwas sa air bag sa iyang sakyanan dihang nabangga kini sa poste kagahapon sa buntag diha sa south coastal road habig sa sitio Laray, barangay San Roque, dakbayan sa Talisay.
Si James Brian Hutchinson, residente sa Gentle Peace Subdivision, barangay Lower Mohon, Talisay nakaangkon lang og gagmay’ng bun-og ug samad sa lawas gidala ngadto sa Cebu Doctors Hospital.
Si SPO2 Frederick Larobis sa Talisay Traffic Division sa pakighinabi niini sa Banat News nagkanayon nga si Hutchinson gikan pa sa trabaho gikan sa dakbayan sa Sugbo paingon na untang mopauli. Apan nakatulog kini samtang nagmaneho sa iyang Toyota Hilux pickup ug pagmata niini diha na siya sa gutter ug dayon milupad ug nabangga sa poste.
Matud ni Larobis nga kusog ang dagan ni Hutchinson hinungdan nga naguba gyud ang sakyanan niini human mabangga sa poste ug ang ubang mga spare parts ang nabuwag apan swerte si Hutchinson tungod kay dunay air bag ang iyang sakyanan nga maoy nakaluwas kaniya sa grabeng kadaot sa lawas. - Brenda Batuto (BANAT NEWS)