CEBU, Philippines - Wala pa makadawat ang pangulo sa Police Regional Office (PRO-7) nga si Chief Supt. Lani-O Nerez sa suwat ni Agusto Corro labot sa request niini nga ibalhin og laing probinsya si Sr. Supt. Vicente Loot ang Deputy Regional Director for Operation sa PRO-7.
Si Corro maoy kaatbang ni Bise Mayor Maria Loot sa pagka-mayor sa lungsod sa Daanbantayan karong election sa Mayo.
Si Nerez gisaway ni Corro tungod sa pagdumili niini pagpabalhin kang Loot nga gipasanginlang nag-apil-apil sa pulitika ug nanghilabot sa mga kalihukan sa kapulisan sa Daanbantayan.
Si Nerez miingon nga hangtud wala siyay nadawat nga reklamo walay basehan aron iya kining ibalhin sanglit i-validate pa usab ang mga reklamo subay sa proseso.
Gitambagan hinuon ni Nerez si Corro nga adto modiretso og hangyo sa Camp Crame. Si Loot kusganong mihimakak sa mga alegasyon sa kaatbang sa kapikas. Si Nerez daan nang miingon nga walay basehanan ug kaniadto pang mga alegasyon nga gibalik-balik ang gibato ngadto kang Loot, gipaniguro usab ni Nerez nga walay papel si Loot sa implementasyon sa mga palisiya sa kapolisan sanglit kining tanan mag-agi kaniya. (BANATNEWS)