CEBU, Philippines - Ang kagamhanan sa lalawigan sa Sugbu mitumbok nga ang Cebu Provincial Detention and Rehabilitation Center kon CPDRC may kaugalingong kinitaan.
Sumala pa ni Provincial Treasurer Roy Salubre nga sa iyang nahibaw-an ang CPDRC mao ra ang prisohan nga mikita dinhi sa Sugbu ug sa Kabisay-an. Matud pa ni Salubre nga sukad gyud sa pagbalhin sa mga inmate sa bag-ong building sa CPDRC didto sa barangay Kalunasan ning siyudad niadtong tuig 2005 ug sa paglingkod ni Gobernador Gwen Garcia, ang naasoy nga jail facility nakahipos na og income.
Si Salubre nagkanayon nga ang kita nagagikan sa mga donasyon sa mga mibisita sa bilanggoan sa probinsiya.
Iyang gitug-an nga mas midako ang mga nadawat nga donasyon sa Kapitolyo dihang misikat na pag-ayo ang sayaw, sa mga "dancing inmates"sa CPDRC dili lamang dinhi sa nasud kundili hangtod na sa tibuok kalibotan.
Giklaro ni Salubre nga ang tanang donasyon nga nadawat sa Kapitolyo may resibo silang gipanghatag sa donor.
Hinuon nagdumili sa pagtug-an si Salubre kun pila na ang kinatibuk-ang kantidad nga nahipos sa probinsiya gikan sa mga donasyon.
Gawas niini, si Salubre mitumbok nga dako usab ang nakita sa mga piniriso sa CPDRC gikan sa mga livelihood program sama sa paghimo og bag ug uban pa diin ang probinsiya maoy tigsuplay kanila og materiales ug mao usab ang mamaligya sa mga human nga produkto.
Dugang pa ni Salubre nga ang mga inmates sa CPDRC nakakuwarta usab sa ilang livelihood bisan pa man kun naa sila sa bilanggoan (BANAT NEWS)