CEBU, Philippines - Mga 60 porsento nang nasulbad ang pagpusil patay sa usa ka magtutudlo sa Binlod Elementary School, sa barangay Binlod, lungsod sa Argao niadtong Miyerkules sa hapon, matud pa ni Sr. Supt. Erson Digal, ang hepe sa Cebu Provincial Police Office (CPPO) kagahapon.
Matud pa ni Digal nga kini nagumikan sa duha ka cartographic sketch nga ilang gihuptan karon nga magsilbing giya sa pagtumbok sa dagway ug hitsura sa kriminal.
Si Digal nga na-interview sa Banat News ug DYSS Super Radyo, nagkanayon nga karong Lunes iplastar na nila sa balita sa telebisyon ug sa pamantalaan ang maong mga cartographic sketch.
Kini aron may giya ang katawhan sa pagtumbok sa hitsura sa killer ni Romeo Aquire Duran nga makaabag sa kapolisan sa pagsikop sa maong mga kriminal. (Guam Logrono) (BANATNEWS)