CEBU, Philippines - Kanselado ang klase sa Binlod Elementary School sa barangay Binlod lungsod sa Argao kagahapong adlawa human daghang mga tinun-an ang mi-absent usa ka adlaw human sa nahitabong pagpusil patay sa usa ka maestro sa maong tunghaan sulod sa classroom niini samtang nagklase niadtong miaging hapon.
Nunot niini si Argao Mayor Edsel Galeos daling mipadala og social worker sa maong tunghaan pinangulohan ni Liza Boteris alang sa pagpahigayon og counseling sa mga tinun-an nga na-trauma sa hitabo apil na ang mga magtutudlo.
Ang mayor maoy mipasalig pag-abaga sa tanang gastuhan sa pagahimoong counseling.
Ang kapitan sa barangay Binlod nga si kapitan Arnel Ruben mipadayag atol sa interview sa usa ka estasyonan sa radyo nga sa 328 ka mga tinun-an sa maong tunghaan gamay ra kaayo ang mitungha kagahapon sa buntag nga gipang-ubanan pa sa ilang ginikanan tungod sa kahadlok.
Gani ang tinun-an sa grade-6 sa gipatay nga maestro nga si Romeo Duran ang wala gyuy bisan usa nga mitungha tungod sa tumang kalisang sa hitabo nga ilang nasaksihan sulod sa classroom. Matud ni kapitan Ruben nga nagkahinabi sila sa mga magtutudlo sa maong tunghaan dihang iyang gibisita sa buntag ug mipahibawong nitawag gyud si Department of Education -7 director Recarido Borgonia sa cellphone aron awhagon ang mga magtutudlo nga ipadayon ang klase apan wala gyud kini matigayun tungod sa kagamay ra sa mitungha nga mga tinun-an gikan sa grade-1 hangtud sa grade-6.
Si Borgonia mipahibalo usab nga nangita na sila og ikahulip sa gipatay'ng magtutudlo aron di maapektahan ang pagtuon sa mga estudyante niini.
Si Engracia Alcain, officer-in charge sa Binlod Elementary School nga nahinabi sa Banat News nagkanayon nga wala pa sila masayod kun duna bay motungha karong adlawa human sa hitabo, apan kini nanawagan sa mga ginikanan nga kuyogan o pugson ang ilang mga anak sa pagtungha.
Kagahapon sa hapon wala nay estudyanteng nahibilin sa maong tunghaan human gipangkuha sa mga ginikanan.
Gikuhaan na og carto-graphics sketch sa kapulisan sa lalawigan sa Sugbu ang upat ka mga mamumuno ni Duran sumala pang Sr. Supt. Erson Digal sa CPPO. Mipadala na usab og dugang imbestigador pinanguluhan ni Insp. Ruben Cuizon si Digal aron pag-abag sa Argao police.
Sumala pang Digal duna silay daghang mga testigos nga gihuptan karon nga nakamay-ong sa mga mamumuno sanglit giingong wala man sila magtaptap sa ilang mga nawong.
Giklaro usab niyang dili mga gun for-hire ang mga gikatahapan, apan ang anggulo sa bangi sa yuta sa pamilya maoy ilang gitutukan nga motibo ug ang mga igsuon niini didto sa Negros ug sa Tulik, Argao ila usab nga imbitaron.
Gibutyag ni Digal nga niadtong milabay’ng duha ka mga semana nabantayan sa mga kaubanang magtutudlo ang biktima nga daw pirming magul-anon ug mo-absent nga di mananghid. – BANAT NEWS