CEBU, Philippines - Gihigpitan sa kapolisan ug mga traffic enforcer sa dakbayan sa Danao ang pagpatuman sa mga balaod alang sa mga drayber sa motorsiklo nga mobiyahe sa dakbayan aron kalikayan ang mga aksidente sa kadalanan.
Si Inspector Aldrin Villacampa, hepe sa traffic section sa kapolisan sa nahisgotang dakbayan nga nahinabi sa Banat News mibutyag nga may mga checkpoint silang gitukod aron dakpon ang mga malapason nga mga drayber.
Matud pa niya nga usa sa mga lagda nga ilang gihigpitan mao ang bahin sa pagsul-ob og crush helmet ug kadtong may tambotso nga walay silencer nga makatugaw sa mga natulog sa panahon sa kagabhion ug uban pa.
Si Ruel Duterte sa operation division sa Danao City Traffic Office (DCTO) nga nahinabi sa Banat News miingon nga mokabat na sa tulo ka sako ang nasakmit nilang tambotso sa motorsiklo ug pulos na naisyuhan og citation ticket ang mga tag-iya niini nga maoy basehan sa pagbayad nila sa multa. - Romeo T. Limpangog (BANAT NEWS)