CEBU, Philippines - Patay diha-diha ang usa ka 26-anyos nga lalaki dihang gipusil makadaghang higayon sa duha ka mga lalaking pulos nagtaptap sa ilang mga nawong samtang naglingkod gawas sa tindahan sa sitio Dual-og barangay Poblacion lungsod sa Carmen niadtong Domingo sa alas 8:00 sa gabii.
Ang biktima nga nabulit sa mga samad pinusilan mao si Alberto Wenceslao Perez, 26, molupyo sa maong lugar ug walay klarung trabaho.
Matud ni PO3 Agustin Bejoc sa Carmen Police dihang nahinabi sa Banat News diha sa gawas sa tindihan si Perez dihang kalit miabot ang tulo ka wala mailhing lalaking sakay og motorsiklo.
Ang duha niini maoy nanaog nga pulos nagtaptap og senina sa ilang nawong diin ang usa miduol sa biktima ug sa walay daghang estorya mipusil kang Perez makadaghang higayun.
Ang biktima nakaangkon og duha ka samad pinusilan sa ulo, laing samad pinusilan sa tuong ilok ug dughan nga maoy hinungdan sa hinanali nga kamatayon niini.
Samtang ang mga suspek yano ra usab misakay sa nagpaabot nga motorsiklo dayung sibat pahilayo, nakuha sa kapolisan ang unom ka kabhang sa bala sa kalibre .45 diha sa crime scene. Ang kapulisan padayun pa sa ilang imbestigasyon pagtumbok sa motibo sa krimen ug sa mga mamumuno ug gisubay na usab ang background sa gipatay. – BANAT NEWS