CEBU, Philippines - Patay ang usa ka mag-uuma human maayong pagkaigo sa ulo sa bala dihang aksidenteng mibuto ang iyang armas nga iyang gilimpyuhan sa pinuy-anan niini sa barangay Sandayong Sur siyudad sa Danao niadtong Lunes sa alas 7:00 sa gabii.
Patay nang nadangat sa tambalanan mao si Gregorio Roto, 48, mag-uuma ug molupyo sa nahisgutang lugar.
Matud pa ni SPO4 Edgar Gomez sa Danao City Police, ang asawa sa biktima nga si Virginia Roto mibutyag atol sa gihimong pagsukitsukit sa kapulisan nga samtang diha siya sa sala sa ilang pinuy-anan niadtong higayuna iyang nakit-an ang bana nga diha sa ilang kwarto naglimpyo sa .38 kalibre nga armas niini.
Paglabay og pipila ka minutos nabantayan ni Virginia nga dunay nilagubo ug paglingi niya natagak ang armas sa sawog ug gipunit unta kini pagbalik sa iyang bana apan way swerte kay kalit kining mibuto.
Dangtan og pipila ka minutos nabantayan niya nga nalup-og ang iyang bana nga nagkadugo na ang agtang niini hinungdan nga nangayo siya og panabang.
Daling gidala sa Danao District hospital ang biktima apan tungod sa delikadong kahimtang gipalahos dayun kini sa mga doctor sa tambalanan dinhi sa dakbayan sa Sugbo apan gideklarar nga dead on arrival.
Samtang ang asawa niini boluntaryong mitahan sa armas nga maoy nakadisgrasya sa iyang bana ngadto sa mga polis. - BANAT NEWS