CEBU, Philippines - Gipasakaan na og kasong paglapas sa Republic Act 9165 kon Comprehensive Dangerous Drug Act of 2002 ang usa sa gikatahapang pusher og shabu nga nadakpan sa kapolisan didto sa barangay Pagsabungan, dakbayan sa Mandaue sa miaging semana.
Si Inspector Reymond Rodriguez sa Mandaue City Police Office (MCPO) miila sa suspetsado nga si Jovenio Retuerto, hingkod nga taga Pagsabungan.
Ang suspetsadong nagtingkagol na karon sa prisohan nadakpan atol sa buy bust operation nga gilusad sa mga otoridad sa miaging semana ug diin nasakmitan siya og shabu uban usab sa mark money nga gigamit sa ilang police decoy sa pagpalit niini.
Giila ni Inspector Rodriguez nga level 2 nga pusher og shabu si Retuerto didto sa ilang lugar ug mamaligya kini bisan ngadto sa mga kasikbit nga dapit sa Mandaue.
Sayo niini ang direktor sa MCPO nga si Senior Superintendent Noel Gillamac miluwat og kamandoan sa paghingusog sa kampanya batok sa illegal nga drugas sa maong dakbayan.
Gani aron mamahimong epektibo ang maong mando, gitugotan niya ang kapolisan nga makapanakop og mga negosyante og drugas bisan ngadto sa kahilitang lugar sa kabarangayan.
Hinuon gitataw ni Gillamac nga ang labing mahinungdanon aron molampos ang maong kampanya mao ang koordinasyon sa tanang kapolisan sa dakbayan sa Mandaue aron motunhay ang kalinaw ug kahusay sa maong lugar. (Romeo T. Limpangog) (BANATNEWS)