CEBU, Philippines - Giawhag sa kanhi presidente sa Catholic Bishop Conference of the Philippines (CBCP) ang Commission on Elections (Comelec) nga himoon ang tanang paagi nga mahimong limpiyo ug hapsay ang umaabot nga piniliay karong Mayo.
Si Bishop Angel Lagdameo sa CBCP nga midalikyat sa pakighinabi sa mga tigbalita dinhi sa Sugbo miingon nga ang pagpatuman sa poll automation nakapatumaw karon sa mga kabalaka sanglit daghan pa ang angayan niini nga andamon.
Dugang pa niya nga gikinahanglan kaayo karong panahona ang tukmang pag-edukar sa mga botante sa bag-ong pamaagi sa piniliay alang sa hapsay nga pagpahigayon niini.
Si Bishop Lagdameo miingon nga ang mga kabus nga botante dinhi sa nasud gikinahanglan gyud nga matudloan pag-ayo ilabi na nga sila ang kinabag-ang sektor sa mga botante.
Matud pa niya nga ang kapakyas sa mga botante sa hustong pagbotar, kapakyasan kini sa katibuk-ang sistema sa election, nga karon pa ipatuman dinhi sa nasud.
Hinuon matud pa ni Obispo Lagdameo nga dili lamang mga botante ang angayang ma-edukar bahin sa bag-ong pamaagi sa pagbotar, kundili bisan ang mga magtutudlo nga moserbisyo sa panahon sa piniliay.
Si Lagdameo miingon nga mas maayo usab sa Comelec nga mangandam gihapon sa pagsagop sa tradisyonal nga paagi sa pagbotar, buwahan to kun mapakyas kining poll automation karon, itakli dayon ngadto sa naandang paagi , ang mano-mano nga sistema sa election, aron nga molampos gayud ang umaabot nga piniliay, matud pa niya. (BANATNEWS)