CEBU, Philippines - Gipaubos karon sa state of disaster preparedness ang kinatibuk-ang dakbayan sa Sugbo aron makapangandam ug daling makatubag sa bisan unsang kalamidad nga posibleng moigo sa siyudad.
Tumong niini nga magamit ang calamity fund sa dakbayan alang sa pre ug post disaster activities ug sa ubang mga programa.
Kini sama sa pagpatuman og mitigating measures, trainings, capabilities building, periodic drills ug information campaign.
Lakip na niini ang stockpiling sa mga relief supplies ug labaw sa tanan, ang pagpamalit og mga ekipo ug uban pang kagamitan alang sa disaster operations.
Si Konsehal Gerardo Carillo maoy mipalabang og resolusyon sa City Council labot niini ingon man ang paggahin og pundo alang sa maong katuyoan.
Samtang laing proposal usab sa konsehal ang giduso sa City Council nga nagdeklarar sa Inayawan Sanitary Landfill ubos sa imminent danger.
Kini tungod usab sa padayong pagbuga og methane gas ingon man sa aso nga niresulta sa environmental ug health hazards.
Partikular na niini ngadto sa mga mulopyo palibot diha sa nahisgutang dumpsite ug sa silinganang komunidad diha sa landfill.
P10 milyones ang pasiunang gahin nga gisugyot sa konsehal nga kuhaon usab gikan sa calamity fund sa City government.
Ang kagamhanan sa dakbayan giingong dunay kapin sa usa ka gatos ka milyon ka pesos nga calamity fund niining tuiga. Ang negosyanteng si Jonathan Guardo nga kandidato pagka-kongresista sa habagatang distrito ubos sa oposisyon nagkanayon sa dihang nasayod sa plano, nga ang dakong “disaster” sa siyudad mahitabo sa Mayo 10, 2010.
Matud ni Guardo nga natagbaw na ang mga tawo sa “style of public service” sa Bando Osmeña Pundok Kauswagan nga sumala pa niya manggamit og pundo sa gobyerno alang sa reelection.
“The fact that Mayor Alvin Garcia is leading over Mike Rama in the survey means people want change and new direction. The fact that I’m tied with Mayor Tom means people want new leadership,” si Guardo nagkanayon sa iyang reaksiyon nga gi-text sa Banat News.
Ang kalamidad, matud niya, gipaabot nga mahitabo atubangan sa City Hall. – BANAT NEWS