CEBU, Philippines - Adunay igong power supply ang kinatibuk-ang Sugbu atol sa gitakdang piniliay karong umaabot buwan sa Mayo.
Kini maoy gipasalig sa mga power producer ug sa ubang mga stakeholder atol sa tigom nga gipatawag ni Bise Mayor Michael Rama kagahapon.
Gipadayag hinoon ni Ethel Natera sa VECO nga sa kasamtangan, pabiling nagkuwang ang ilang supply nga miresulta sa puli-puli og lugar nga brownout.
Kini tungod usab sa mga power plant nga gipaubos sa preventive maintenance service ilabi na ang atua sa Mahanagdong, Leyte.
Subay niini gipahimangnoan ni Natera ang mga Sugbuanon nga magdaginot sa paggamit sa elektrisidad ilabi na panahon sa mga peak hour.
“Ug mugamit man ta og kuryente sama sa pagpangutaw, kung mahimo adto na sa lawom nga kagabhion o sayong kabuntagon nga ubos ang gamit sa kuryente,” sumala ni Natera.
Gitataw hinoon ni engineer Robert Uy sa National Grid Corporation of the Philippines (NGCP) nga mahibalik na ang operasyon sa mga power plant nga gipaubos sa maintenance check sugod sa sunod semana.
Kini gawas sa pag-operate usab unya sa Cebu Energy Development Corporation sa siyudad sa Toledo sugod sa tunga-tungang bahin niining buwana. Ang nahisgutang power producer giingong mo-generate og kapin sa 200 ka megawatts diin usa ang VECO nga suplayan niini.
Nasayran nga ang CNP grid nanginahanglan og 600 ka megawatts nga i-supply ngadto sa mga distribution utility sama sa VECO.
Apan kung mahibalik na ang operasyon sa tanang mga power plant uban sa pag-operate sa bag-ong independent power producer, giingong muabot na unya sa 1,300 ka megawatts ang malabay niini ngadto sa CNP.
Kini giingong sobra na unya sa gikinahanglang power supply sa Sugbu ug sa ubang bahin sa Kabisay-an. – BANAT NEWS