CEBU, Philippines - Usa ka 19-anyos nga dalaga ang mireklamong gilugos sa iyang ka-textmate nga uyab nga 17-anyos human usab sila mag-date niadtong milabay'ng gabii sa barangay Poblacion lungsod saSibonga, apan ang reklamo nahimo hinuong dalan ngadto sa ilang kaminyuon.
Ang 19-anyos nga dalaga mipasangil nga gilugos siya sa iyang textmate nga 17-anyos kinsa nadakpan sa gipahigayong follow-up operation sa kapulisan sa Sibonga niadtong Huwebes sa gabii.
Si PO3 Ederlino Bacusmo, imbestigador sa kapulisan sa Sibonga Police Station nga gikahinabi nagkanayon nga ang dalaga ug ang gireklamo nagkasabot nga magkita sa plaza sa lungsod niadtong alas-5 sa hapon sa adlaw'ng Huwebes. Ang duha giingong nananghid pa sa ginikanan sa dalaga nga mangaon sa Poblacion ug manuroy, matud pa nga giingong miadto sa kasilyas ang lalaki aron mangihi apan gumikan kay nahadlok ang dalaga nga mag-inusara miinsister nalang kining adto nalang sa balay sa lalaki kini papangasilyason.
Apan samtang naglakaw pipila nalang ka metros una pa sa balay sa suspek nakaagi sila sa usa ka abandonadong tindahan ug didto giingong kalit gibunlot sa lalaki ang dalaga ug didto gilugos. Human sa hitabo gibiyaan sa lalaki ang dalaga hinungdan nga mipauli kini ug misumbong sa iyang mga ginikanan ug giubanan ngadto sa police station ug sa gihimong follow-up operation nadakpan ang gireklamo.
Sumala pang Bacusmo miangkon ang lalaking dugay na silang nagkauyab sa dalaga pinaagi lang sa text.
Nunot sa maong hitabo gikatahong nabali ang hangin human ang ginikanan sa duha nagkasabot nga ipakasal nalang sila.
Ang lalaki gibuhian sa kapulisan human magpinirmahay nga kaslon sila karong bulan sa Agosto ning tuiga tungod kay giingong karon pang Hunyo mag-18 ang edad sa suspek. Karon adlawa ang gikasabutang pamalaye ug giingong imbitado pa ang mga polis ug mga sakop sa Department of Social Welfare and Development isip mga sponsors sa kasal. (BANATNEWS)