CEBU, Philippines - Usa ka tag-iya og sari-sari store ang gikawatan ug gidunggab patay sa wala mailhing tawo sa milabay'ng gabii sa Purok 4, Cambinocot, ning dakbayan.
Ang biktima giilang si Anita Auman Bontilao, 56, nagpuyo sa maong dapit nga nanag-iya og usa ka sari-sari store nga gipangunayan niini og bantay.
Sa imbestigasyon sa Homicide Section sa Cebu City Police Office, ang 12-anyos nga apo sa biktima diha sa gawas ug nagluto og pagkaon dihang kini nakamatikod sa usa ka wala mailhing lalaking nagdali og gawas sa tindahan.
Matud pa niini nga ang maong tawo nagsul-ob og jacket nga brown ug may gitaptap nga itom nga panapton sa nawong ug may gibitbit nga kutsilyo ug paspas nga midagan padulong sa ngitngit nga bahin sa maong dapit ug wala na igkita.
Tungod niini daling gisusi sa bata ang tindahan sa apohan ug mao nalay iyang nakit-an ang biktima nga nagbuy-od na og wala na usab ang arinolang sudlanan sa halin sa tindahan niini.
Ang bata daling nagpatabang sa uyoan nga si Joey Cabatingan, 34, kinsa mao nay midala sa biktima ngadto sa North General Hospital apan gideklarar kining dead on arrival tungod sa naangkong mga samad dinunggaban sa lawas.
Ang kapolisan padayon pang mihimo og follow-up sa maong kaso alang sa pag-ila sa mamumuno. (BANATNEWS)