CEBU, Philippines - Dead-on-arrival sa tambalanan sa dakbayan sa Danao ang usa ka police nga sakop sa Carmen Police Station human kini gi-atake sa hypertension kagahapon sa buntag sa Wharf sa barangay Poblacion, Carmen.
Ang namatay mao si SPO1 Joselito Jopia, kapin sa 40-anyos taga barangay Fuente lungsod sa Carmen gideklarar sa mga doctor nga DOA human giatake samtang nag-duty isip kabahin sa crowd and security control diha sa wharf atol sa gipahigayong reenactment sa ilang Sinulog Festival nga ipahigayon unta karong adlawa.
Si SPO2 Simplicio Gibo, sa Carmen desk officer nagkanayon nga si SPO1 Jopia uban sa ilang chief of police Insp. Carlos Reyes Jr. nagbantay sa lugar dihang giatake kini sa sakit.
Apan bisan paman kun nadali kini’g dala sa tambalanan wala gihapon kini masalbar ug namatay gyud kini, gikatahong taud-taod nang gihambin sa maong polis ang maong balatian.
Hinuon ang pangulo sa kapulisan sa lalawigan sa Sugbu Sr. Supt. Erson Digal, mipahibalong hatagan gyud sa ensaktong benispyo sa PNP si SPO1 Jopia kinsa taud-taod na sa serbisyo. (Guam Logroño) (BANATNEWS)