CEBU, Philippines - Moabot na sa 74 ka dengue cases ang natala sa Cebu City Health Department sa unang duha ka semana niining buwana ug mikalas na og usa ka kinabuhi.
Kini mas taas itandi sa dengue cases sa susamang period sa miaging tuig nga duna lay 56 ka kaso samtang usa usab ang namatay, matud pa ni assistant City epidemiologist Durenda Macasucol nga ang labing daghan nga kasong natala gikan sa barangay Guadalupe nga dunay walo ka dengue cases.
Kini gisundan sa barangay Budlaan, Pahina Central, Poblacion Pardo, Basak Pardo, Punta Princesa, Bacayan, ug barangay Labangon nga dunay tag-tulo ka kaso.
Ang dakbayan padayon sa ilang gihimong anti-dengue campaign sa kabarangayan sa dakbayan nga gitawag og ‘search and destroy operation,’ ‘dengue fever surveillance’ ingon man ang pulong-pulong tali sa mga molupyo ug sa mga opisyal sa kabarangayan.
Midugang ang assistant City epidemiologist nga ila pa unyang hingusgan ang kampanya batok sa dengue sugod sa sunod buwan pinaagi usab sa green star project ni Mayor Tomas Osmeña nga gitakdang ilusad karong umaabot nga Pebrero 1.
Ang nahisgutang programa naglakip sa search and destroy sa breeding site sa mga lamok, ug ang pagpahigayon og entomological survey, kadtong mga panimalay sa siyudad nga masutang limpyo papitlan gilayon og green star sticker.
Kini isip pag-ila usab sa usa ka pinuy-anan nga limpyo ug luwas gikan sa gikahadlukang makamatay nga sakit nga dengue.
Sa pikas bahin, padayong giawhag ni Macasucol ang mga Sugbuanon nga batasanon ang pagpanglimpyo sa ilang palibot aron malikayan ang nahisgutang sakit.
Partikular na niini ang pagyabo sa napundong tubig diha sa mga ligid ug flower vases ug uban pa nga posibleng kaitlugan sa mga lamok nga nagdala sa dengue virus. (Elly Bolonos) (BANATNEWS)