CEBU, Philippines - Sunodsunod nga rotation brown-out gipatuman sa Visayan Electric Company (VECO) sugod kagahapong adlawa tungod sa kadako sa kakulang sa power supply gikan sa National Power Corporation ug mga Independent Power Producers dinhi sa Sugbo.
Sumala pa sa tigpamaba sa VECO, Ethel Natera nga ang power shortage karon wala lamang masinati dinhi sa Metro Cebu Area kun dili lukop Kabisay-an ug sa Mindanao.
Si Natera miingon nga gisugdan nila ang pagpatuman sa usa ka oras nga rotation brown-out mga alas 9 ang takna kagahapon sa buntag.
Matud pa ni Natera nga ang hinungdan sa power shortage dinhi sa Visayas ug Mindanao mao ang non-availability sa power supply gikan sa Luzon Area.
Si Natera miingon nga ang kakulangon sa supply sa kuryente niabot ngadto sa 40 ka megawat matag adlaw.
Samtang gitataw usab niini nga ang laing hinungdan nga nakatampo sa dugang power shortage mao ang tinuig nga preventive maintenance ug pagkaguba gyud sa ubang power plant sa mga power generators nga mao karon ang gisaligan sa VECO.
Hinuon gipaniguro ni Natera nga dili maapektohan sa rotation brown-out karong adlawa ang Cebu International Convention Center (CICC) sa Mandaue diin ipahigayon ang labing unang presidential forum dinhi sa Sugbo.
Ang problema sa power supply dinhi sa Sugbo ug sa Kabisay-an gipaabot nga maoy usa sa pagatukion sa presidential forum nga pagasalmotan sa mga kandidato pagka-presidente sa umaabot nga eleksiyon. - BANAT NEWS