CEBU, Philippines - Ang kagamhanan sa dakbayan sa Talisay kagahapon miawhag sa mga negosyante nga manglukat na og bag-ong business permit (BP) aron dili makamulta.
Ang awhag gihimo ni Jane Enrile, hepe sa Business and Licensing Office sa pakighinabi niini sa Banat News kinsa mibutyag nga ang siyudad adunay 2000 ka mga rehistradong balay patigayon.
Matud niya nga niadtong Enero 4, 2010 ang siyudad nagsugod na sa pagpang-renew sa mga BP ug matapos kini karong Enero 20, 2010.
Kadtong molapas sa gikatakdang adlaw sa pag-renew sa ilang permit makabayad og multa nga 25 porsyento sa ilang balayranan.
Si Enrile nagkanayon usab nga karong buwan na sa Pebrero niining tuiga maoy ipanawat nila sa mga bag-ong molukat og BP.
Base sa listahan sa kantidad nga bayran alang sa lukatong BP, ang may tinuig nga kita nga ubos sa P50,000 mahimo rang adto molukat og BP sa ilang barangay. – BANAT NEWS