CEBU, Philippines - Mga taga-Mandaue ug silingang kalungsoran sa amihanan misungasong sa kadautan sa panahon agi’g pagpakita sa ilang debosyon sa Sr. Sto. Niño gikan pa sa Santos nga Misa diha sa National Shrine ni Saint Joseph sa barangay Centro sa dakbayan sa Mandaue hangtud na sa paghatud niini ug sa Birhen sa Guadalupe diha sa Ouano Wharf alang sa fluvial parade.
Wala makapakgang ang pagbunok sa ulan ug kabugnaw sa panahon sa debotos pagkuyog sa foot procession subay sa dalan Catalino Ouano Ave. hangtud na sa Ouano Wharf sa barangay Looc sa nahisgutang dakbayan.
Ang mga debotos tungod sa kadautan sa panahon nakapangandam gihapon, ang uban kanila nanagdala nang daan og mga payong, kalo, jackets ug ang uban nagsuot pa gyud og kapote, samtang pipila kanila nanagdala og pagkaon ug thermos.
Si Monsiyor Cristobal Garcia mikuyog sa kaparian sa dakbayan sa foot procession uban usab sa pipila ka mga opisyal sa dakbayan nga gipangulohan ni Mayor Jonas Cortes ug unang ginang nga si Sarah Cortes.
Si Konsehal Diosdado Suico nga deboto usab ni Sr. Sto. Niño dihang nahinabi sa mga tigbalita mipadayag nga mao na kini ang ika-20 kapin na ka tuig niyang pagkuyog sa foot procession ni Sr. Sto. Niño.
Gitataw ni Konsehal Suico nga bisan pa man sa maong kahimtang sa panahon apan sa gihapon wala kini makapugong sa iyang pagkuyog sa foot procession.
Si Eldefonsa Maribeles, 77, biyuda nga taga lungsod sa Consolacion kinsa kuyog sa iyang mga anak ug mga apo mitambong sa misa ug foot procession nga nahinabi sa Banat News miingon nga nahimo na niyang tulomanon ang pagtambong sa misa sa kaadlawon sa matag tuig nga pagbisita sa imahen ni Sr. Sto. Niño sa dakbayan sa Mandaue.
Matud pa niya nga sa gagmay pa iyang mga bata kaniadto nagsugod siya sa pagtambong niini hangtod karon nga nangapo na lang sa gihapon iyang kining gipadayon.
“Gihimo ni nako matag tuig agi’g pasalamat ni Sr. Sto. Niño sa mga panalangin ug maayong lawas sa tibuok namong pamilya,” nagkanayon si Eldefonsa. (Romeo Limpangog) (BANATNEWS)