CEBU, Philippines - Nasikop ra gyud sa kapolisan sa Lapulapu ang usa ka barangay tanod sa Looc sa maong dakbayan lakip ang usa ka batan-on nga maoy mipusil patay sa usa ka tinun-an sa high school sa milabay’ng tuig.
Ang nasikop nga tanod mao si Lewey Tampus Deguilmo, 26, ulitawo, apan dunay kapuyo, kauban ang usa ka Sandy Martin Cabalhug, 19, pulos mga residente sa maong dapit.
Matud pa ni Lapulapu City Police Operations Chief Insp. Jacinto Mandal nga ang duha ka suspek maoy responsable sa pagpusil patay kang Joel Premacio Pinas, 19, nga tinun-an sa Gun-ob Night High School atol sa usa ka disco sa Sitio Locata, barangay Looc, Lapulapu niadtong Agosto 2009.
Matud pa ni Insp. Mandal nga si Cabalhug migunit sa biktima ug si Deguilmo maoy mipa-um-om sa kalibre .45 nga pistola ngadto kang Pinas dayong kablit sa maong armas hinungdan sa kamatayon niini.
Sulod sa lima ka bulan nga pagtagotago sa duha ka suspek, si Dequilmo ug Cabalhug nasikop sa ilang tagsatagsa ka panimalay pinaagi sa warrant of arrest nga giisyu ni Judge Toribio Quiwag sa RTC Lapulapu tungod sa kasong murder.
Hinuon si Deguilmo miangkon sa maong krimen nga iyang nahimo samtang mitug-an usab kini nga siya nahimong tanod sa barangay Looc sukad pa niadtong tuig 1999 hangtod sa iyang pagkasikop. - Bong Soriano (BANAT NEWS)