CEBU, Philippines - Mosugod na og panawat karong adlawa ang Devotee City ug mga deboto ni Sr. Sto. Niño nga wala'y kasak-an dinhi sa dakbayan sa Sugbu samtang nagpadayon ang mga selebrasyon sa kapistahan.
Kini maoy gipahibawo ni Konsehal Edwin Jagmoc, nga maoy chairman sa Devotee Accommodation Committee sa Sinulog 2010.
Matod ni Jagmoc nga 84 ka container vans ang gibutang kilid sa Fort San Pedro aron dunay kapuy-an ang mga deboto nga nangita og temporaryong kapuy-an.
Ang mga deboto nga nagpuyo sa kalungsuran gikan sa Carcar paingon sa habatagan ug Danao City paingon sa amihanang Sugbu, ug niadtong nagagikan sa ubang probinsya ang mahimong makapahimulos sa nahisgutang pasilidad.Nagkanayon si Jagmoc nga kadtong gusto nga mosulod sa Devotee City gikinahanglan lang nga magparehistro.
Gikinahanglan hinoon nga mopakita sila og mga ebidensya nga sila nagagikan sa halayong lugar sama sa ticket sa barko o bus, ID, sedula ug uban pa.Bisan kung ang Devotee City karon lang adlawa opisyal nga modawat og mga deboto, apan miingon si Jagmoc nga duna nay pipila ka debotong wala nila mabalibari dihang miduol kanila.
Moabot sa 2,000 mil ka out-of-town devotees ang temporaryong nakapuyo sa Devotee City atol sa miaging tuig nga Sinulog festivities.Apan tungod sa gidugang nga 12 ka container vans, nagtuo si Jagmoc nga mas daghang deboto ang masulod sa Devotee City hangtud unya sa Lunes sa udto human sa Sinulog.
Ang Devotee City maoy usa ka proyekto sa kagamhanan sa dakbayan nga naghatag og libreng serbisyo nga naglakip sa tubig ug elektrisidad sugod pa niadtong 1996.
Ang mga deboto nga gikan sa nagkadaiyang lugar nga wala'y paryente sa siyudad mahimo nalang molahos og adto sa Fort San Pedro duol sa Plaza Independencia aron magparehistro ug mopahimulos sa gitanyag nga serbisyo.Midugang si Jagmoc nga ang Devotee City alang usab sa mga vendors gikan sa laing dapit nga anha lang matulog palibot sa Basilica del Santo Niño ug sa City Hall. – BANAT NEWS