CEBU, Philippines - Usa ka drayber sa taxi kinsa giingong nagpasinsiyo og mini nga P1,000 gikulata sa iyang agawon didto sa usa ka gasolinahan sa dakbayan sa Talisay kagahapon sa buntag.
Ang biktima mao si Sergio Kailim, hingkod, nga taga Basak-Pardo sa dakbayan sa Sugbo, drayber sa Shawnder taxi, samtang ang mikulata kaniya mao ang iyang agawon nga tag-iya sa taxi kansang ngalan nakalimtan niya.
Ang biktima nagtibi nga mitug-an sa kapolisan sa Talisay ug nagkanayon nga nabulit sa bun-ong ang iyang kalawasan gumikan sa mga bug-at kaayong kinumo sa iyang amo.
Si SPO1 Oliver Dacua, duty desk officer sa Talisay Police Station mitug-an sa Banat News nga ang biktima nagpatubil og gasolina sa usa ka gasolinahan sa maong dakbayan ug mibayad kuno kini og mini nga P1,000 .
Gumikan kay natubilan na ang taxi sa biktima unya dili madawat ang kuwartang iyang gibayad kay mini, mitawag ang kahera sa gasolinahan ngadto sa tag-iya sa taxi nga gimaneho sa biktima.
Unya ang agawon sa biktima kalit lang miabot sa gasolinahan ug malagmit gumikan sa kalagot ug kapungot niini, giingong gidabodabohan dayon sa iyang mga kinumo ang biktima. - Raymond D. Abarcas (BANAT NEWS)