CEBU, Philippines - Pormal nga gibuksan kagahapon ang “Ang Tipiganan sa mga Kanta ug Kinaiyang Sugbuanon Foundation Inc.” diha sa karaang building sa The Freeman sa dalan Jakosalem ug V. Gullas ning dakbayan sa Sugbo.
Ang pagbukas gitambungan sa mga inilang Cebu artists nga sila si Pilita Corrales, Dulce Amor ug Raki Vega ingon man nila ni Gobernador Gwendolyn Garcia, Kongresista Nerissa Soon-Ruiz ug Msgr. Esteban Binghay.
Si Gullas midugang nga ang tumong niya sa pagpasiugda sa pagbukas sa maong museum mao ang pagpreserbar sa mga Sugbuanong kanta ug mga kinaiyang Sugbuanon.
Anha makita ang mga handumanan sa mga kantang Binisaya, mga kantang sinuwat nila ni Ben Zubiri kinsa nailhan usab sa ngalan nga “Iyo Karpo” nga mao ang kantang “Matud Nila,” ug uban pa.
Makita usab diha ang mga karaang instrumento sa mga kompositor sama sa sista, piano, harpa, banjo, violin ug uban nga gigamit nila ni Mingoy Lopez.
Gawas pa niini makita ang mga commissioned paintings nga nagpakita sa kinaiyang Sugbuanon ug Kulilisi sa hari nga usa ka dula diin ang mga panultihon naggikan sa Bibliya.
Si kanhi Kongresista Jose “Dodong” Gullas nagkanayon nga karong Pebrero 2, 2010 pormal na nga buksan ang museum gikan sa alas 9:00 sa buntag hangtud sa alas 4:00 sa hapon alang sa publiko.
Ang museum bukas gikan sa Lunes hangtud sa Biyernes sa nahisgutang mga oras ug ang mosulod niini mobayad og entrance fee nga P20 ug P10 lang sa mga estudyante aron dunay magamit sa pagmentenar niini. – BANAT NEWS