CEBU, Philippines - Usa ang patay duha ang angol apil na ang usa ka mabdos dihang gipamusil sa duha ka lalaking nagtaptap sa ilang mga nawong diha sa sitio Lala-an barangay Bulasa lungsod sa Argao niadtong Domingo sa alas 7:00 sa gabii.
Ang biktimang namatay mao ang drayber sa motorsiklo nga si Wensard Tolerom, 25, molupyo sa sitio Tonggo sa barangay Taloot, samtang naangol ang asawa niining mabdos nga si Rowena Tolerom, 24, ingon man ang ikatulo nilang angkas nga si Joeffrey Gonzales, 18, pulos mga molupyo sa nahisgutang lugar.
Matud pa ni PO2 Von Tecson sa Argao Police dihang nahinabi sa Banat News nga namauli gikan nangompra sa lungsod ang magtiayong biktima dihang gihangyo ni Gonzales nga moangkas usab pauli.
Apan pag-abot nila sa ngitngit nga lugar kalit lang may mi-overtake nga laing motorsiklo kansang mga sakay pulos nanagtaptap sa mga nawong ug mibabag sa ilang agianan.
Ang drayber sa motorsiklo giingong mimando kanila sa pagpahunong sa pagtuong dunay tuyo ang maong mga lalaki mihunong si Tolerom (bana) apan kalit lang mibunot og wala matinong kalibre sa armas ang angkas sa mibabag nga motor dayong pamusil kanila makadaghang higayon.
Si Wensard naigo diha sa dughan ug sa walang bukton usab maigo ang asawa niining si Rowena samtang sa walang paa si Gonzales naigo sa bala.
Human sa hitabo daling misibat ang mga mamumuno paingon sa lungsod sa Argao nga direksiyon ug naatol nga dunay usa ka langyaw nga nahiagi sa maong lugar ingon man si Judge Oliver Peras ug mga sakop sa 1st Cebu Ready Reserve Battalion nga gikan sa Medical Mission sa Sayao, Sibonga ug mao nay mitabang sa mga biktima paghatud sa Isidro Kintanar Memorial Hospital sa lungsod apan gideklarar nga dead on arrival si Wensard.
Gibalhin usab dayun sa Vicente Sotto Memorial Hospital dinhi sa dakbayan sa Sugbo ang duha ka mga biktima alang sa dugang medikasyon.
Ang kapulisan padayon pa sa ilang hot pursuit operation pag-ila ug pagsikop sa mga suspek aron matumbok ang motibo sa krimen.
Personal nga kasungian ang gitutukang motibo sa kapulisan sa nagpadayon niining imbestigasyon sa maong krimen. BANATNEWS)