CEBU, Philippines - Gumikan sa pagkaliso sa pangisip ug sa bug-at nga balatian sa lawas, duha ka tawo nga naghambin niini, pulos naghikog sa managlahing dapit ning lalawigan sa Sugbo kagahapon sa hapon ug sa miaging buntag.
Ang napalgang patay nga nagbitay nga hiniktan og pisi ang liog kagahapon sa hapon mao si Melvin Pradilla, 40, minyo, sa barangay Tabagak, lungsod sa Madredijos, samtang si Esmeraldo Orongan, 49, nga taga sitio Carajay, barangay Gun-ob, dakbayan sa Lapulapu napalgang patay na nga nagbitay sa likod sa ilang balay sa miaging buntag.
Ang nakakita kang Pradilla nga nagbitay sulod sa ilang balay nga wala nay kinabuhi, mao ang iyang anak nga menor de edad, samtang si Orongan nakit-ang nagbitay nga patay na sa likod sa ilang balay pinaagi sa iyang kapuyo nga si Lucia dela Cruz.
Nasayran sumala kang PO1 Julius Ceasar Seares sa Madredijos Police Station nga gikasab-an sa iyang ugangan si Pradilla sa wala pa kini maghikog, samtang si PO3 Dioscoro Arong sa Lapulapu City Police Station nagkanayon nga may balatiang gihambin si Orongan nga maoy hinungdan sa paghikog niini. (Guam Logroño ug Romeo T. Limpangog) (BANATNEWS)