CEBU, Philippines - Nahimong tensyonado ang gipahigayon nga clearing operation sa buhatan sa Investigation and Detective Management Branch (IDMB) kagahapon sa buntag sa mga vendor sa dalan Jakosalem ug Osmeña Boulevard sa dakbayan sa Sugbo.
Sa pakighinabi sa Banat News ni Superintendent Pablo Labra, iyang giangkon nga may dyutay’ng kaguliyang sa mga vendor sa ilang paglimpyo sa maong mga dalan apan sa kaulahi-an nakasabot ra usab ang mga tindera ug tindero.
Gibutyag usab ni Labra nga ilang gilimpiyohan ang maong mga dalan aron nga dili masabod ang dagan sa mga sakyanan sa maong lugar ilabi na sa mga adlaw sa Sinulog.
Gipapahawa sa team ni Labra ang tulo ka karumatang tindahan ug usa ka stall diha sa maong mga lugar tungod kay misuyla na kini ngadto sa agianan sa mga tawo kun pedestrian. Matud pa ni Labra nga ang gitogutan ra nga makapaninda sa maong lugar mao ra kadtong manindahay og kandila.
Gumikan sa kahigpit sa balaod , destinohan usab og mga sakop sa Barangay Intelligence Network (BIN) ug kapolisan sulod sa 24 oras ang maong dapit aron wala nay makapaninda diha.
Sa laing bahin gilusad usab sa team ni Labra ang usa ka saturation drive alas 10:00 pasado sa miaging gabii didto sa barangay Labangon ning dakbayan sa Sugbo, gumikan sa dili pa dugay’ng gang war sa maong lugar nga namatyan og usa ka ulitawo sa miaging adlaw. (Lesley Caminade) (BANATNEWS)