CEBU, Philippines - Giaprubahan na ni Presidente Gloria Macapagal-Arroyo ang Republic Act 9905 nga balaudnong magbuwag sa sitio Banawa ug Englis gikan sa barangay Guadalupe ug mahimo na kining barangay Banawa-Englis sa dakbayan sa Sugbu. Si Cebu City South district Rep. Antonio Cuenco mitawag sa The Freeman (igsuong pamantalaan sa Banat News) kagahapon nga nagpahibalong ang bill nga gi-file niya niadtong Septiyembre 30 sa milabay'ng tuig nahimo nang balaod human pirmahe ni Arroyo niadtong Enero 7, 2010.
“I am glad that this was finally approved by the President,” matud pang Cuenco.
Subay sa RA 9905 moepekto human sa 15 ka adlaw nga publikasyon sa duha ka mga pamantalaan nga general ug local circulations nga sumala pang Cuenco sugdan karong umaabot nga adlaw'ng Lunes sa duha ka pamantalaan sa Manila ug duha usab sa Cebu.
Ang RA 9905 usab nagmando sa Commission on Elections sa pagpahigayon og plebisito sa nahisgutang mga sitio sulod sa 30 ka adlaw human moepekto ang maong Akta ug kuhaon ang budget niini gikan sa Contingent Fund sa Comelec.
Duna dayo'y himuong special elections alang sa unang set sa mga barangay officials sulod sa 60 ka adlaw human ma-ratify sa mayoriya ang botos sa plebisito ug sila anha mag-opisina sa Banawa.
Mahimo na usab nga mahatagan og Internal Revenue Allotment subay sa Section 285 of Republic Act 7160 kun Local Government Code of 1991 ang maong barangay.
Gitinguha ni Cuenco nga pagbuwag sa duha ka sitio gikan sa Guadalupe gumikan kay ang naulahi maoy labing daghan og populasyon nga barangay sa tibuok Visayas nga may 49,956 base sa 2007 Census. – BANAT NEWS