CEBU, Philippines - Mikabat sa upat ka tawo ang napaig , 382 usab ka panimalay ug 57 ka mga gagmay'ng tindahan ang naugdaw sa tulo ka mga dagkong sunog nga nahitabo sa dakbayan sa Mandaue sa miaging tuig 2009.
Kini ang nasayran sa Banat News kagahapon gikan kang FO3 Cifriano Codilla, imbestigador sa kabomberohan sa maong dakbayan.
Matud pa ni Codilla nga niadtong Mayo 24 sa miaging tuig nasunog ang 280 ka mga gagmay'ng balay sa sitio Limonsito ug sitio Manga sa barangay Umapad sa maong dakbayan. Sa maong sunog ,mikabat usab sa P2.8 milyones ang gibiling danyos apan walay kinabuhing nakalas. Gisundan sa laing dakong sunog sa Villa Mangga sa barangay Opao sa maong dakbayan niadtong Septiyembre 30 ug mikabat sa 72 ka mga gagmay'ng balay ang naugdaw ug usa ka babaye ang nalakip sa pagkapaig ug ilang gibanabana ang danyos sa kantidad nga P2.5 milyones.
Niadtong Disyembre 24, maoy labing ulahing sunog sa maong dakbayan nga mikalas og tulo ka kinabuhi ug miugdaw sa 57 ka mga tindahan og paboto sulod sa firecracker zone sa reclamation area.
Si Codilla miingon nga mikabat sa P100,000 ang gibanabana nilang kadaot sa maong sunog. - BANAT NEWS