CEBU, Philippines - Patay'ng lawas sa wala mailhing batan-ong lalaki ang napalgan nga naglutaw sa kadagatan sa Cabahug Seashore sa barangay Opao, dakbayan sa Mandaue alas-5 pasado ang takna niadtong miaging Lunes sa hapon.
Si Inspector Ramil Morpos sa homicide section sa kapolisan sa maong dakbayan mibanabana sa maong patay’ng lawas nga nagpanuigon og 20 ngadto sa 25 anyos, kasarangan lamang ang panglawas, 5’ 3” ang pamarog ug nagsul-ob kini og pink nga t-shirt ug maong nga purol.
Matud pa niyang usa ka Vincent Requiso, 24, nga taga Opao sa maong dakbayan nga naligo sa maong lugar maoy unang nakakita sa maong patay’ng lawas.
Dugang pa ni Morpos nga posibleng nalumos ang maong batan-on samtang naligo sa maong dapit sanglit wala sila makakita og mga timailhan nga adunay foul play ang kamatayon niini. - BANAT NEWS