CEBU, Philippines - Patay ang usa ka 74-anyos nga lalaki human kini unaya sa pagdunggab sa usa sa mga tenant sa iyang balay nga paabangan niadtong Lunes sa gabii diha sa sitio Kalmar, barangay Lawaan I, dakbayan sa Talisay.
Ang biktima giila sa mga polis nga si Vicente Hermosada, residente sa maong lugar kinsa nakaangkon og samad dinunggaban sa tuong bahin sa iyang tampihak ug patay nang naabot sa Talisay City District Hospital.
Ang suspetsado mao si Jelson Sigue, 30, nagpuyo sa nahisgutang lugar apan lumad nga taga probinsiya sa Bohol ang daling miikyas human sa hitabo ug padayon pa kining gipangita sa kapolisan.
Ang grupo ni PO3 Mikie Espina nga maoy miresponde sa insidente nga gikahinabi sa Banat News kagahapon mibutyag nga si Hermosada ug Sigue ang duna nay nangaging panagbanging personal ug gidudahan sa kapolisan nga posibleng may kalambigitan sa abangan sa balay. Apan niadtong adlaw nga nahitabo ang insidente walay nakabati nga nag-away si Hermosada ug Sigue apan dunay nakakitang misulod si Sigue sa balay sa biktima ug pipila ka minutos ang milabay nagdali kining migawas, miuli sa iyang gipuy-ang balay, migawas nga nagdala na og mga butang ug hangtud karon wala na kini igkita. – BANAT NEWS