CEBU, Philippines - Walay nakalusot nga kargamentong kontrabando diha sa pantalan sa dakbayan sa Sugbo atol niadtong pagsugat sa Bag-ong Tuig 2010.
Daan na kining gipasalig ni ESS Customs Police District Commander Captain Jerry Arizabal atol sa pakighinabi sa Banat news.
Matud pa ni Capt. Arizabal nga siya mismo kauban sa skeletal force sa Customs Police maoy nangunay og bantay sa tanang miabot nga kargamento sa Cebu International Port kon CIP atol sa pagsugat sa Bag-ong Tuig.
Daan nang naandan ni Arizabal sa mga dapit diin siya madistino nga motrabaho panahon sa Pasko ug Bag-ong Tuig bisan pa og layo siya sa iyang pamilya atol sa maong kasaulogan.
Gihimo ni Arizabal ang higpit nga pagbantay aron dili na masubli ang mga panghitabo diha sa CIP pipila na ka tuig ang nilabay dihang atol sa pagsugat sa Bag-ong Tuig may midunggo nga mga kuwestiyonableng mga kargamento sama sa sinakong bugas ug mga luhong sakyanan.
Kini tungod kay nagkumboya ang pipila ka kawani sa Customs kinsa sa pagkakaron gipanaktak na sa trabaho samtang may pipila pa usab nga nagpabilin pa.
Tungod kay gawasnon pa karon ang uban, ang mga tinugyanan sa buhatan sa Customs wala nay kompiyansa.
Gumikan niini iyang gimandoan ang iyang mga sakop nga magmabinantayon atol sa mga dagkong kalihokan sa panahon sa Pasko ug sa Bag-ong Tuig. – BANAT NEWS