CEBU, Philippines - Napalgang patay na nga nagbitay sa sanga sa dakong punoan sa kulo ang usa ka lalaki kinsa gituohang naghikog tungod sa kahiubos sa iyang hinigugma alas-2 pasado ang takna sa kaadlawon sa sitio Kulo sa barangay Marigondon, dakbayan sa Lapulapu.
Ang namatay mao si Fernando Abendan Pagubo, nagpuyo sa maong dapit ug nagtrabaho isip clean and green nga kawani sa kagamhanan sa maong dakbayan.
Si SPO1 Frederick Islet sa kapolisan sa maong dakbayan miingon nga sa sayo pa sa gabii kuyog ang namatay sa mga higala nga nag-inom sa usa ka tindahan sa nahisgutang lugar.
Dugang pa niya nga nananghid kini sa mga higala nga mopauli alas-12 pasado ang takna sa gabii apan nianang paglabay sa duha ka oras nakaplagan na kining nagbitay na sa maong punoan sa kahoy luyo sa ilang balay.
Matud pa ni SPO1 Islet nga gitabang kini sa mga silingan ug gidala sa Mactan Doctors Hospital apan gideklarar kini sa mga doktor nga dead on arrival.
Si Islet miingon nga gituohang nagselos ang namatay sa iyang hinigugmang babaye dihang nakit-an niya kining may gikakuyog nga laing lalaki.
Sumala pa sa kapolisan nga ang namatay misuway na og hikog sa miaging bulan tungod gihapon sa pangabubho ngadto sa iyang uyab apan nabantayan sa mga kabanay ug napugngan. (BANAT NEWS)