CEBU, Philippines - Makadawat og dakong pinaskuhan ang 26 ka pamilyang molupyo sa barangay Ermita karong adlawa human gipahibalo nga ihatag na ngadto kanila ang titulo sa yutang ilang gipuy-an atol kini sa Christmas Party sa Ermita Sports Complex.
Ang makadawat sa maong titulo mao ang 26 ka pamilyang sakop sa Proper Ermita Homeowners pinanguluhan ni Herming Rosas inabagan sa ilang barangay kapitan nga si Felicisimo “Emok” Rupinta.
Mao na kini ang ika-upat nga batch nga nahatagan og titulo diha sa maong asosasyon. Sa milabay'ng tuig adunay 33 ka pamilya na usab ang nakadawat sa ilang titulo, moabot na sa 59 ka pamilya ang nakadawat sa maong mga luna.
Dugang pa niini ang 45 ka laing pamilyang kansang mga papeles naandam ug giingong pirma nalang ni Mayor Tomas Osmeña ang gipaabot.
Ang maong mga titulo giaprubahan sa Department of the Welfare of the Urban Poor pinaagi sa direct lot purchase subay sa memorandum of agreement tali sa dakbayan ug sa mga asosasyon diha sa Ermita. Samtang ang 46 ka mga miyembro usab sa Kawit Ermita Homeowners Association nakadawat na usab sa ilang mga titulo
“Sa pagkakarun hayag na ang ilang kaugma-on, makatulog na sila pag-ayo ug malipayon na silang moingon, Dili na kami eskwater, mga landowner na kami,” sumala pa sa pamahayag ni Kagawad Maria Pino Buanghug nga mao sad ang tsirman sa Committee on Urban Poor sa maong barangay. BANATNEWS)