CEBU, Philippines - Usa ka roll-on roll-off (RORO) ferry nga nagdala og 88 ka tawo ang nalunod sa kadagatan sa San Agapito, Isla Verde sa Batangas samtang naglawig padulong sa Batangas City niadtong Sabado sa gabii, diin kapin pa sa 20 ka pasahero ang missing ug lima na ang patay.
Ang M/V Baleno 9 nga gipanag-iya sa Besta Shipping Lines gikatahong migikan sa Calapan City sa Oriental Mindoro nalunod pasado alas-10 sa gabii duol sa maong isla nga usa sa gitumbok nga mga lugar sa Pilipinas nga accident prone area, sumala pa sa report sa GMA News.Tv.
Ang mga survivors mibutyag nga nakadungog sila og lanog nga lagubo ug nabantayan nalang nila ang kalit nga pagtakilid sa maong ferry boat ug nisunod dayon ang pagsulod sa tubig. Ang mga pasaherong nangaluwas gikatahong wala na makahigayon pa sa pagsuot sa ilang mga life vests gumikan sa kapaspas sa panghitabo.
Ang mga pasahero mitug-an nga nagsugod og sulod ang tubig gikan sa dulong (unahan) sa maong ferry ug uwahi na kaayo silang nakamatikod sa sunod nga nahitabo.
Sa pasiunang listahan sa mga survivors nga nadala diha sa Batangas Port giila ang mga survivors nga sila si Joseph Aldaba Jr., Eric Glenn, Edison Escares, Francisco Barbajano, Rona Avila, Michael Talipay, Alberto Perez, Reynaldo Madrigal, Eduardo Quimbo ug Edwin Hidalbo. Samtang ang uban nailhan palang sa ilang mga pangalang Archie, Perry, and Buboy; Hermogenes Jr., Delos Reyes, Cajoyong, ug duha ka Peñaranda.
Sumala pa sa report sa Philippine Coast Guard (PCG), duna nay 66 ka mga pasahero ang naluwas samtang 25 pa ang missing, apan sa report sa DzBB sa sayo pa kagahapon, giingong 20 ra ka tawo ang nabutang sa manipesto.
Ang maong ferry gikatahong makapasakay og 268 ka tawo, maong gisalikway dayon ni PCG spokesman Lt. Commander Armand Balilo nga overloaded kini.
Ang PCG nagpadala na og tulo ka mga barko nga naglakip sa BRP Davao del Norte sugod pa niadtong Sabado sa tungang gabii samtang nagpadulong na usab ang BRP Iloilo sa Philippine Navy sa maong dapit.
Kagahapon hasta ang Islander plane sa Philippine Navy sa Cavite milibot sa kahanginan sa Isla Verde aron pagtabang pagpangita sa mga pasahero.
“Pumasok ang tubig sa bow ramp naapektuhan ang stability ng barko. Nung tumagilid siya, hindi na siya nakabawi at lumubog na,” matud pang Balilo sa samang report. Ang maong aksidente sa kadagatan nahitabo duha ka adlaw human usab magbangga ang usa ka ferry nga ginama sa kahoy ngadto sa usa ka metal-hulled nga fishing boat diha sa Limbones Island sa Cavite nga mikalas og tulo ug 24 ang missing.
Ang MV Baleno-9 may gibug-atong 199 gross tons ug gipanag-iya sa Besta Shipping Lines nga iya ni Pedro Ang sumala pa report, duna kini 18 crew ug 70 pasahero niadtong pagkahitabo ug may kargang siyam ka mga rolling cargoes base sa manifesto niini.
Samtang lima ka mga patay'ng lawas ang nakuha diha sa kadagatan duol sa gikalunoran sa maong ferry, giingong nag-edad kini og usa ka walo ka buwang batang babaye, duha ka babaye ug usa ka lalaking hamtong sumala pa ni Senator Richard Gordon, ang chairman sa Philippine National Red Cross, kini gikumpirmar usab ni PCG Commandant, Admiral Wilfedo Tamayo. Sumala pa ni Balilo, gimandoan na ni Department of Transportation and Communications (DOTC) secretary Leandro Mendoza ang Maritime Industry Authority (Marina) nga suspensuhon una ang operasyon sa tanang ferry sa Besta Shipping samtang nagpahigayon og imbestigasyon ug pagsusi sa kaluwas sa ilang mga barko. – BANAT NEWS