CEBU, Philippines - Naukay kagahapon sa buntag ang mga residente sa sitio Lumboy, barangay Muabog, lungsod sa Tabogon tungod sa babaye ug lalaking parehong naghubo nga napalgang patay sulod sa usa ka abandonadong payag ug ang mga lawas gitagod-tagod.
Si Senior Inspector Alexander Angcao hepe sa Tabogon Police Station miila sa mga biktima nga sila si Crispin Dogon alyas “Titing”, 23, taga barangay Tabo-aw ug Pacita Doldol alyas “Itis” 26, dalaga taga barangay Muabog pulos sa maong lungsod.
Usa ka Tapias Brion, 56, taga barangay Muabog maoy gitumbok nga suspek sa maong linuog nga krimen tungod kay gikatahong dugay na kining naibog kang Doldol ug nagselos usab kini ngadto kang Dogon.
Nasuta usab nga si Brion dunay pending nga kasong “acts of lasciviousness” nga dunay kalambigitan sa Akta Republika 7610 kun “child abuse. Apan gawas kang Brion duna pay laing tawo o anggulong gisusi nga posibleng nalambigit sa krimen tungod kay ilang nahibaw-an nga si Doldol duna say laing uyab gawas kang Dogon.
Base sa imbestigasyon, usa ka Felino Monares, tanod sa barangay Muabog nakadungog og singgit sa usa ka babayeng nangayo og panabang hinungdan nga mipaduol siya sa gigikanan sa tingog.
Apan nahilom kini hinungdan nga wala nalang usab siya mopadayon og susi ug kagahapon sa buntag mibalik siya sa lugar ug mao nalay iyang nakit-an ang katunga sa lawas sa babaye nga milusot gikan sa bungbong sa payag ug wala nay kinabuhi.
Dihang iyang gisulod ang payag nakita usab niya ang lawas sa lalaki nga naghay-ad ug wala nay kinabuhi, ang duha pulos walay sapot.
Base sa nakitang samad tinigbasan sa kalawasan nagtuo si Angcao nga grabe ang kasuko sa kriminal ngadto sa mga biktima tungod kay gitagod gyud og tigbas ang mga lawas niini.
Si Pacita gituohang buot untang moikyas ug milusot sa bungbong maong milugwa ang katunga sa lawas niini gawas sa payag.
Sumala pa ni Angcao nga ang duha sa wala pa mahitabo ang insidente parehong nakit-ang nag-disko ug nasubay diha sa cellphone ni Crispin nga mi-text si Pacita nga pagawson na kini gikan sa diskohan.
Gikan didto gituuhang miadto sila sa maong payag diha sa libon nga lugar diin mahitabo ang krimen.
Ang plug sa spark plug sa motorsiklo ni Crispin nga giparada diha sa unahan sa payag gitangtang usab ug nagtuo ang kapolisan nga gituyo kini og tangtang sa mamumuno aron dili kini moandar.
Ang mga personal nga butang sa duha lakip na ang mga cellphone na-recover sa mga polis sa maong payag. (BANATNEWS)