CEBU, Philippines - Usa ang namatay samtang usa usab sa angol sa nahitabong panunggab ug panigbas sa managlahing lugar ug oras ning dakbayan sa Sugbo.
Ang nakabsan og kinabuhi mao si Ricardo Mahinay, 41, drayber sa traysikad nga taga barangay Ermita, samtang ang naangol mao usab si Rosalino Abella Ibena, 43 , nga usa ka mag-uuma nga taga sitio Iba, barangay Cambinocot.
Si Mahinay giluba sa silingan niyang si Argie Agrawante , 23.
Nasayran sa kapolisan gikan kang Benny Bas Lagrimas nga pasahero sa biktima nga samtang nagpadagan ang naulahi sa iyang traysikad ,iyang nasayran nga kini hubog unya nagkadinasmagay ug ang traysikad sa suspetsado ug didto nagsugod ang mainit nga linalisay sa duha.
Ang suspetsado nga mibati gyud og grabing kasuko miuli sa ilang balay ug sa pagbalik niini nagdala na og kutsilyo ug sa walay duhaduha gihansakan dayon sa tiyan ang biktima ug giligwat-ligwat pa kini una ibta.
Gihatod dayon sa Cebu City Medical Center ang biktima apan namatay kini pipila ka takna ang milabay.
Hinuon mitahan dayon sa mga otoridad ang suspetsado ug nagtingkagol na kini karon sa prisohan sa Carbon Police Station.
Samtang si Ibena, giingong nagpadulong na kini pauli sa ilang balay sa miaging buntag dihang giatangan siya sa iyang silingan nga si Christopher Galve Melendez nga nagbitbit og sundang.
Matud pa ni Mahinay nga mihinayhinay siya og lakaw dihang gisangpit siya og kalit sa suspetsado ug sa paglingi niya gihabas dayon siya sa dalang sundang niini ug natabas ang iyang abaga.
Aron sa pagsalbar sa iyang kinabuhi mikaratel og dagan ang biktima nga nagtabisay ang dugo sa abaga niini.
Gigukod siya ug maayo nalang kay bisan mahinay ang iyang apilyedo, paspas kaayo ug tulin pa sa alas 4:00 siyang nakadagan hinungdan nga wala gyud siya hiapsi sa suspetsado.
Nadala dayon siya sa Cebu City Medical Center samtang ang suspetsado nadakpan usab ni Konsehal Florencio Limutan sa barangay Cambinocot ug karon nagpahayahay na sa prisohan. BANAT NEWS