CEBU, Philippines - Naugdaw ang unom ka mga lawak saringan human kini masunog sa barangay Cambanay dakbayan sa Danao sa milabay’ng hapon.
Ang nasunog mao ang unom ka classroom sa Cambanay Elementary School sa maong dapit.
Atol sa imbestigasyon ni SFO1 Leopoldo Pesquera ang imbestigador sa kabomberohan sa dakbayan sa Danao nasuta nga nagsugod sa lawak nga giokupahan ni Ivy Arresgado usa ka magtutudlo ang kalayo.
Gikatahong sa kisame sa maong lawak nagsugod ang kalayo ug daling mikatap.
Gumikan kay ginama sa karaang kahoy ang maong edipisyo ug sa kakaraan na sa mga electrical wirings dali kining naugdaw lakip na ang mga kabtangan sulod sa maong mga lawak sama sa mga libro sa mga tinun-an hinungdan sa pagkusog sa maong kalayo.
Hinuon walay gikatahong nasamdan ug naangol atol sa maong sunog diin gibanabanang mokabat ngadto sa 1.2 milyones ka pesos. - Bong Soriano (BANAT NEWS)